बङ्गलादेशका महामहिम राजदूत श्री एम. डी. शाफिकुर रहमानज्यूलाई म्याग्दी उद्योग वाणिज्य संघले आज एक विशेष समारोहबीच स्वागत गरेको छ। संघको कार्यालय परिसरमा सम्पन्न सो स्वागत समारोह म्याग्दी उद्योग वाणिज्य संघका अध्यक्ष सुविन श्रेष्ठको अध्यक्षतामा सम्पन्न भएको हो। कार्यक्रममा संघका पूर्व अध्यक्षहरू, पदाधिकारी, स्थानीय उद्योगी–व्यवसायी, विभिन्न संघ–संस्थाका प्रतिनिधि तथा सञ्चारकर्मीहरूको उपस्थिति रहेको थियो।
कार्यक्रममा प्रमुख अतिथि समेत रहेका महामहिम राजदूत रहमानले नेपाल र बङ्गलादेशबीच व्यापारिक, सांस्कृतिक, शिक्षा तथा पर्यटन क्षेत्रका सम्बन्धहरू अझ प्रगाढ बनाउन म्याग्दीले महत्वपूर्ण भूमिका खेल्न सक्ने बताउनुभयो। उहाँले म्याग्दीको प्राकृतिक सौन्दर्य, जलविद्युत् उत्पादनका सम्भावना, कृषि उत्पादन र पर्यटन क्षेत्रका अवसरहरूको उच्च प्रशंसा गर्दै आपसी सहकार्य र लगानीका माध्यमबाट दुवै देशका नागरिकहरू लाभान्वित हुन सक्ने विश्वास व्यक्त गर्नुभयो।
राजदूत रहमानले बङ्गलादेशमा नेपाली उत्पादनहरूको बजार विस्तार तथा पर्यटन प्रवर्द्धनका लागि आफू सकारात्मक रूपमा सहयोग गर्न तत्पर रहेको पनि बताउनुभयो। उहाँका अनुसार, दुवै देशका उद्योगी तथा व्यवसायीबीच प्रत्यक्ष साझेदारी र लगानी विनिमयका कार्यक्रमहरू सञ्चालन गर्न सके आपसी सम्बन्ध अझ बलियो बन्नेछ।
कार्यक्रमका अध्यक्ष सुविन श्रेष्ठले महामहिम राजदूत रहमानलाई म्याग्दी भ्रमणका लागि हार्दिक स्वागत गर्दै उद्योग, वाणिज्य र पर्यटन विकासका क्षेत्रमा सहयोग र साझेदारीको अपेक्षा व्यक्त गर्नुभयो। उहाँले म्याग्दीका स्थानीय उत्पादनहरू, पर्यटकीय सम्भावना र व्यावसायिक वातावरणको प्रवर्द्धनमा राजदूतको भ्रमणले नयाँ प्रेरणा दिने विश्वास पनि व्यक्त गर्नुभयो।
कार्यक्रमको अन्त्यमा म्याग्दी उद्योग वाणिज्य संघका तर्फबाट महामहिम राजदूतलाई म्याग्दीको सांस्कृतिक तथा प्राकृतिक पहिचान झल्काउने प्रतीकात्मक उपहार प्रदान गरिएको थियो। कार्यक्रममा मैत्रीपूर्ण वातावरणमा अन्तर्क्रिया समेत भएको थियो, जहाँ दुवै देशबीच भविष्यमा व्यापार, लगानी र पर्यटन प्रवर्द्धनका सम्भावनाबारे विस्तृत छलफल गरिएको थियो।
