म्याग्दी जिल्लामा चालु आर्थिक वर्ष २०८२/०८३ को पहिलो पाँच महिनामा ९ जनाले आत्महत्या गरेको तथ्याङ्क सार्वजनिक भएको छ। जिल्ला प्रहरी कार्यालय म्याग्दीको अपराध अनुसन्धान शाखाले उपलब्ध गराएको विवरण अनुसार, साउनदेखि मंसिरसम्मको अवधिमा यो संख्या देखिएको हो।
प्रहरीको तथ्याङ्क अनुसार आत्महत्या गर्ने ९ जनामध्ये ८ जना पुरुष र १ जना महिला रहेका छन्। उमेर समूहका आधारमा हेर्दा १८ देखि ३५ वर्ष उमेरका युवाहरू सबैभन्दा बढी प्रभावित देखिएका छन्, जसमा ५ जनाले ज्यान गुमाएका छन्। यस्तै ३५ देखि ६० वर्ष र ६० वर्ष माथिका २/२ जना रहेका छन्।
कहिले र कुन समयमा बढी घटना? महिनागत रूपमा हेर्दा असोज महिनामा सबैभन्दा बढी ४ वटा घटना भएका छन्। त्यस्तै, भदौ र मंसिरमा २/२ जना तथा साउनमा १ जनाले आत्महत्या गरेका छन्। बारका आधारमा बुधबार सबैभन्दा बढी ३ वटा घटना भएका छन् भने समयका आधारमा बिहान ६:०० देखि दिउँसो १२:०० बजेको बीचमा सबैभन्दा धेरै ४ वटा घटना भएको प्रहरीको पत्रमा उल्लेख छ।
किन हुँदैछन् यस्ता घटना? प्रहरीको प्रारम्भिक अनुसन्धानले मानसिक स्वास्थ्य र सामाजिक कारणहरूलाई मुख्य जिम्मेवार देखाएको छ। आत्महत्याका कारणहरूलाई निम्नानुसार वर्गीकरण गरिएको छ:
मानसिक विचलन र कमजोर आत्मबल: ५ वटा
मानसिक असन्तुलन: २ वटा
दीर्घ रोग: २ वटा
जिल्ला प्रहरी कार्यालय म्याग्दीको अनुसार “हाम्रो तथ्याङ्कले विशेषगरी युवा वर्गमा मानसिक विचलन र कमजोर आत्मबलका कारण यस्ता दुखद घटनाहरू बढी भइरहेको देखाउँछ। समाजमा मानसिक स्वास्थ्यबारे सचेतना फैलाउनु र संकटको समयमा समयमै परामर्श पाउनु आजको आवश्यकता देखिएको छ।”
